Nota aan Uitsaaiers: Vind aangehede klankgrepe in Afrikaans en Engels deur Soret Viljoen
Die DA het bewyse van die onwettige heffings aan voorafbetaalde kragmeter-rekeninghouers, by die Finansiële Portefeulje en Uitvoerende Raad ingedien.
Die DA eis ook dat die Tswaing Plaaslike Munisipaliteit die R13.6 miljoen wat onwettig aan voorafbetaalde kragmeter-rekeninghouers oor die afgelope 10 jaar gehef is, terugbetaal word aan die geaffekteerde inwoners.
Sedert 2015 hef Tswaing Plaaslike Munisipaliteit ‘n basiese elektrisiteitstarief op voorafbetaalde kragmeter-rekeninge. Die Nasionale Energiereguleerder van Suid-Afrika (NERSA) het egter nog nooit so ‘n tarief vir Tswaing Plaaslike Munisipaliteit goedgekeur nie.
Tswaing Plaaslike Munisipaliteit het dus die afgelope dekade onregmatig R9 648 067 op die inwoners van Delareyville, R2 425 091 op die inwoners van Sannieshof, en R1 559 619 op die inwoners van Ottosdal gehef. Die DA het bewyse, insluitend rekords van ongeveer 85 rekeninghouers en 10 jaar se NERSA-goedkeurings, aan die Finansiële Portefeulje en die Uitvoerende Raad van Tswaing voorgelê en die Raad versoek om dringend op te tree deur die gesteelde fondse terug te kry.
Die Uitvoerende Raad, onder leiding van Munisipale Bestuurder Sello Maroga, Finansiële Bestuurder Johannes Mogoemang, Burgemeester Norah Mahlangu, en ANC-raadslede Puseletso Mokoto en Zane Molehabangwe, het egter enige besluit om hierdie onreg reg te stel, belemmer.
Dit is uiters kommerwekkend dat die ANC-beheerde munisipaliteit skuld erken het in die verslag wat aan die Finansiële Portefeulje voorgelê is, maar weier om die fout reg te stel en die R13.6 miljoen wat oor 10 jaar van inwoners gesteel is terug te betaal.
Die DA het reeds ‘n in-diepte ondersoek deur NERSA aangevra in ‘n poging om hierdie diefstal te stop en rekeninghouers se geld terug te kry. Ons sal aanhou veg vir geregtigheid en aanspreeklikheid om inwoners teen hierdie uitbuiting te beskerm.