Hierby aangeheg is die volgende klankgrepe:
Engels deur Freddy Sonakile, LPP en Provinsiale Leier NW
Afrikaans deur Carin Visser, DA Provinsiale Voorsitter NW.
Setswana deur Barnard Manne, DA Raadslid inMadibeng.
- DA eis dringende optrede ná die gewelddadige plaasmoord op Hannetjie van Zyl naby Ottosdal.
- Landelike gemeenskappe verdien doeltreffende polisiediens.
- DA eis sterker landelike polisiëring en gelyke beskerming vir almal.
Die Demokratiese Alliansie (DA) in Noordwes eis dringende ingryping ná nog ’n skokkende en gewelddadige plaasmoord in die Ottosdal/Wolmaransstad-gebied op Maandag, 5 Oktober 2026.
Die wrede moord op Mev. Hannetjie van Zyl (55) het by die ingang se veiligheidshek van haar plaashuis plaasgevind. Kriminele het haar van agter aangeval en haar verskeie kere met ’n ysterstaaf teen die nek en kop geslaan voordat hulle haar handsak en selfoon gesteel het. Sy het die hek oopgemaak en was besig om terug in haar voertuig te klim om haar eiendom binne te gaan toe sy aangeval is.
Haar man, Sarel van Zyl, het haar erg beseer aangetref. Hy het die voorval onmiddellik op die landbouveiligheidsgroepe aangemeld, wat steeds die enigste onmiddellike reaksiemeganisme is waarop baie boerderygemeenskappe in Noordwes kan staatmaak.
Mev. Hannetjie van Zyl was ’n besonder goedhartige persoon wat goed bekend was in die gemeenskappe van Ottosdal, Migdol en Wolmaransstad. Tragies genoeg het sy op pad na die hospitaal in Klerksdorp aan haar beserings beswyk.
Haar dood is ’n skokkende voorbeeld van die sistemiese mislukkings wat steeds veroorsaak dat landelike gemeenskappe in die Noordwes-provinsie van geregtigheid, veiligheid en beskerming ontneem word. Haar familie, vriende en die breër gemeenskap eis beslissende optrede en ’n deeglike ondersoek deur die SAPD. Die versuim om die polisie se mandaat om veiligheid en sekuriteit in landelike gebiede te verseker, voldoende uit te voer, plaas die lewens en lewensbestaan van boere, plaaswerkers en landelike gemeenskappe toenemend in gevaar.
Die SAPD in Ottosdal, ongeveer 17 kilometer van die plaas, is gekontak, maar het eers ’n uur later op die toneel opgedaag. Volgens die familie het die polisie aangedui dat hulle nie die voorval as ’n plaasaanval beskou nie, maar eerder as diefstal van ’n handsak – ten spyte daarvan dat ’n 55-jarige vrou wreed aangerand is en uiteindelik haar lewe verloor het.
Die werklikheid van gewelddadige plaasaanvalle en -moorde moet erken en aangespreek word. Hierdie misdade moet as ’n prioriteit hanteer word, want erkenning sonder optrede is betekenisloos.
Die DA se standpunt is duidelik: landelike veiligheid vereis ’n behoorlik toegeruste en aanspreeklike polisiediens wat die unieke uitdagings waarmee boerderygemeenskappe te kampe het, erken. Die DA steun sterker provinsiale polisiëringskapasiteit, beter samewerking tussen die SAPD, provinsiale en plaaslike regering, boere en landelike veiligheidstrukture, asook toegewyde hulpbronne om te verseker dat die polisie vinnig en doeltreffend op misdaad in landelike gebiede kan reageer.
Daar kan nie van landelike gemeenskappe verwag word om op WhatsApp-groepe en private sekuriteitsnetwerke as hul eerste en enigste verdedigingslinie staat te maak terwyl die staat versuim om sy grondwetlike verantwoordelikheid om hulle te beskerm, na te kom nie.
Die DA bly daartoe verbind om die landelike en gemeenskapsveiligheidskrisis aan te spreek en dringende optrede te eis om die voortdurende gewelddadige en wrede aanslag op boerderygemeenskappe regoor Noordwes die hoof te bied.
Sonder ernstige en onmiddellike hervorming sal ons landelike gemeenskappe voortgaan om in stilte te ly, wat die grondslag van ons ekonomie en voedselsekerheid bedreig.
Die DA neem hierdie saak verder en sal aan die Noordwes Provinsiale Polisiekommissaris skryf om antwoorde te eis oor die polisie se reaksie op die aanval, die klassifikasie van die voorval en die ondersoek na Mev. Van Zyl se moord. Die DA sal voortgaan om elke beskikbare toesigmeganisme te gebruik om te verseker dat landelike gemeenskappe die beskerming ontvang wat hulle verdien.
Die DA in Noordwes eis daarom gelyke beskerming vir alle landelike gemeenskappe, plaaswerkers en boere.
Hulle verdien meer as simpatie. Hulle verdien veiligheid.
Stem DA op 4 November om Noordwes vir almal aan die werk te kry.